diamanteen hondartzan bizirik gabe
aurkitu genuen itsas txakurrari

lurrak eta itsasoak zure gorpua har dezatela

bazter honetara ekarri zaituzten olatuekin

izotzarekin bat eta asko izan zaitezela

bizi berri bat elikatuz beste zerbait bilakatuz

algak eta loreak haz daitezela zure begi-zuloetan

eta lanperna-musuak habia egin dezala

zure barneko itsaslabarretan

hegan egin dezazula diamante zuri

eta urezko hodeien artean igeri egin dezazula

bizi berri bat sorginduz beste zerbait bilakatuz

hondartza eskari poema honen lanbro ilun

eta distiratsuan desizoztu zaitezela

geldiro lasaiki glaziar bat nola

eskuen artetik ihes egiten digun

iluntzea bezala