Pariseko arratsa

                B. Semperflorens-i

                (Begoña Hidalgo Diez)

Latin karrikako

beirazko kafetegi batean

barnea ttipitzen zaigu

eguna azken hatsa

ematen dueino.

Hegazkin urrun bat

ortzian barna...

Ezin ikusizko esku batek

soineko urdinaren

kremailera isila

zabaldu du astiro,

larru-azal laranja kolorekoa

une batez bederen

agerian utziaz.

Eta haur bati

erien artean

ihesi doakion

puxikaren antzera,

ortzi urdinean gora

abiatu egin da

ilargi betea.