Txotxe kapitain pilotu

Jose Martin Urrutia Txotxe artista elgoibartarrak 2018ko otsailean utzi gintuen, baina egindako lan itzelaren arrastoak gelditzen zaizkigu. 1995. urtean sortutako Euskal Antzerki Talde Amateurren Elkarteko (eatae) kide izan zen. Durangoko Kurutziaga ikastolan antzerkia irakatsi eta zabaltzeaz gain, San Agustin Kulturgunearen magalean Karrika antzerki taldea sortu zuen. Esan liteke horretan ere aitzindari izan zela, antzerki talde egoiliarra izaten. Bai eskolan eta bai Karrikan transmisio lan ikaragarria egin zuen eta hainbat aktore atera ziren berak ereindakotik. ^[6]

      Inauterietan, Markina-Xemeingo Eup! irratian genbiltzanok kontzertuak eta antzerki emanaldia antolatu genituen. Kontzertuak hiltegi zaharrean egin ziren eta antzerkia kalean. Bihotza taupaka jartzen zitzaidan horrelako gertaera bat herrian suertatzen zenean. Eta, oraingoan gainera, gu ginen antolatzaileak. Elgoibarko Ekekei antzerki taldearen Ni naiz kapitain pilotu izan zen ekarri genuen obra. Oker ez banabil, hura izan zen ikusi nuen lehen kale-antzerki ikuskizuna. Txotxek Kapitain Pilotu pertsonaia nagusia antzezten zuen.

      Nire etxeko gelan jarri nuen antzerkiko lehen kartela izan zen. Bat-batean, kartelari begiratu eta oihukatu nuen: Ze demontre! Orain ni naiz kapitain pilotu! Horrela, Madrilera joan nintzen nire ametsen txaluparekin, antzerkiaren itsasoan nabigatzera.