Lehenengo agerraldia

 

Hoteleko gela garestia Leedsen —hain garestiak diren horietako bat, munduko edozein tokitakoa izan litekeena.

 

Birentzako ohe handi bat dago.

Hozkailutxoa eta xanpaina izotzetan.

Telefonoa.

Lore sorta handi bat.

Bi ate —bata pasilloko sarrera da, besteak komunera ematen du.

 

Bi lagun sartzen dira —ian eta cate—.

 

ianek 45 urte ditu, Galesen jaioa, baina bere bizitzako urte gehienak Leedsen eman ditu eta bertako doinueraz mintzatzen da.

 

catek 21 urte ditu, behe-erdi mailako klaseko hegoaldetarra, Londreseko hegoaldeko doinuaz mintzatzen da eta estresatuta dagoenean totel egiten du.

 

Sartzen dira.

 

cate atean geldirik, gelaren dotoretasunak harriturik.

ian sartzen da, egunkari fardel txiki bat ohe gainean botatzen du, zuzenean hozkailutxora doa eta gin luze bat zerbitzatzen dio bere buruari.

Kaleari begirada labur bat botatzen dio leihoaren kanpoko aldetik, gero buelta ematen du gela barruan sartzeko.

 

ian: Hau baino toki hobeagoetan kaka egin dut nik.

 

(Zurrutada batez gin osoa edaten du.)

 

          Kiratsak hartuta nago.

          Bainatu nahi duzu?

 

cate: (Buruaz ezetz dio.)

 

ian komunera doa eta ur txorrotada aditzen dugu. Gelara itzultzen da gerriaren bueltan toalla bat eta eskuan errebolber bat daramatzala. Kargaturik dagoela egiaztatu eta burkoaren azpian sartzen du.

 

ian: Horri eskupekoa emaiozu ogitartekoak ekartzen dizkigunean.

 

50 penike utzita komunera sartzen da.

cate barrurago sartzen da gelan.

Poltsa askatu eta saltotxoak ematen ditu ohe gainean eserita.

Gelan zehar ibiltzen da, tiradera guztietan kuxkuxeatzen du, dena ukituz.

Loreak usaindu eta irribarre egiten du.

 

cate: Xarmagarria.

 

ian gelara itzultzen da, ilea bustita, toalla gerriaren bueltan, bere burua sikatzen ari dela.

Gelditu eta cateri begiratzen dio, emakumea bere erpurua zupatzen ari da.

ian komunera itzultzen da, han jantziko du arropa.

Komunean eztul izugarria egiten aditzen diogu.

Konketan tua bota eta berriro sartzen da gelan.

 

cate: Ondo al zaude?

 

ian: Ez da ezer.

 

Bere buruari beste gin bat zerbitzatzen dio, orain izotza eta tonikaz, eta erritmo lasaiagoz edaten du.

Errebolberra berreskuratu eta besapeko zorroan sartzen du.

Irribarre egiten dio cateri.

 

ian: Pozten naiz etorri izanaz. Ez nuen uste etorriko zinenik.

(Xanpaina eskaintzen dio.)

 

cate: (Buruaz ezetz dio.)

          Kezkatuta nengoen.

 

ian: Honengatik? (Bere bularra seinalatzen du.) Lasai.

 

cate: Ez nuen hori esan nahi. Goibel ematen zenuen.

 

ian: (Xanpaina irekitzen du. Kopa bana zerbitzatzen du.)

 

cate: Zer ari gara ospatzen?

 

ian: (Ez dio erantzuten. Leihora hurbiltzen da eta kanpora begiratzen du.)

          Hiri hau gorroto dut. Kiratsa dario. Kongito eta pakiz beteta dago.

 

cate: Ez hitz egin horrela.

 

ian: Zergatik ez?

 

cate: Ez da oso zuzena.

 

ian: Beltzatxoak gustatzen zaizkizu, ala?

 

cate: Ian, ez hasi.

 

ian: Gure laguntxo morenoak gustukoak dituzu, ezta?

 

cate: Berdin zaizkit.

 

ian: Heldua izan.

 

cate: Neba joaten den eguneko zentroan indiarrak daude. Edukazio handikoak dira.

 

ian: Hala behar da.

 

cate: Batzuk lagunak ditu.

 

ian: Atzeratua da, ezta?

 

cate: Ez, ikasteko zailtasunak ditu.

 

ian: Horixe. Motza.

 

cate: Ez, ez da.

 

ian: Eskerrak gure semea ez dela horrelako mongolo bat!

 

cate: Ez d- deitu horrela.

 

ian: Zuen amak pena ematen dit. Zuetako bi horrelakoak.

 

cate: Horrelakoak n- nola?

 

ian: (Emakumeari begiratzen dio, jarraitzeko ala ez erabakitzen ari dela. Ez jarraitzea erabakitzen du.)

          Maite zaitudala jakin badakizu.

 

cate: (Irribarre handi bat egiten du, adeitsua eta ez-sexuala.)

 

ian: Ez dut nahi zu inoiz joatea.

 

cate: Gaua pasatzera etorri naiz.

 

ian: (Edaten du.)

          Berriz izerditan. Kiratsez nago. Ezkontzea pentsatu al duzu inoiz?

 

cate: Nor ezkonduko litzateke nirekin?

 

ian: Ni.

 

cate: Nik ezin izango nuke.

 

ian: Ez nauzu maite. Ez da zure errua, ni ez nintzateke nirekin ezkonduko.

 

cate: Ezin izango nuke ama alde batera utzi.

 

ian: Egunen batean utzi beharko duzu.

 

cate: Zergatik?

 

ian: (Ahoa zabaltzen du erantzuteko baina ez zaio erantzunik bururatzen.)

          Atean joka daudela aditzen da.

          ian harridurak hartuta, cate atea irekitzera doa.

 

ian: Ez ireki.

 

cate: Zergatik ez?

 

ian: Esan nizun zergatik.

 

Errebolberra besapeko zorrotik hartu eta aterantz joaten da.

Adi dago.

Ezer ez.

 

cate: (Barre urduriaz.)

 

ian: Ixxxx(o).

 

Adi dago.

Ezer ez oraindik.

 

ian: Kongitoa izango da, bokatekin. Ireki.

 

catek atea irekitzen du.

Ez dago inor, erretilu bat ogitartekoekin soilik.

Ogitartekoak hartzen ditu eta begira geratzen zaie.

 

cate: Urdaiazpikoa. Ez da izango.

 

ian: (Ogitarteko bat hartu eta jaten du.)

          Xanpainik?

 

cate: (Buruaz ezetz dio.)

 

ian: Zer duzu ba urdaiazpikoaren kontra?

 

cate: Haragi hila. Odola. Nik ez dut animaliarik jaten.

 

ian: Inor ez litzateke enteratuko.

 

cate: Ez, ezin dut, benetan ezin dut, botaka hasiko nintzateke.

 

ian: Txerrikia besterik ez da.

 

cate: Gosez nago.

 

ian: Hartu horietako bat.

 

cate: ezin dut.

 

ian: Indiar batera gonbidatuko zaitut.

          Dios! Zer da hori? Gazta.

 

catek irribarre zabala egiten du.

Gazta ogitartekoak urdaiazpikoetatik banandu eta jaten ditu.

ianek begiratzen dio.

 

ian: Zure jantziak ez zaizkit gustatzen.

 

cate: (Bere arropari begira.)

 

ian: Lesbiana ematen duzu.

 

cate: Zer da hori?

 

ian: Ez duzu oso sexya ematen. Horixe.

 

cate: A!

 

(Jaten jarraitzen du.)

 

          Zure arropak ere ez ditut oso gustukoak.

 

ian: (Bere arropei begiratzen.

          Gero altxatu, arropa kendu eta neskaren aurrean biluzik paratzen da, zutik.)

          Zupatu iezadazu.

 

cate: (Begira dagoela. Barrez lehertzen da.)

 

ian: Ez?

          Primeran.

          Kiratsak hartuta nagoelako?

 

cate: (Are barre gehiago.)

 

ian janzten saiatzen da baina lotsak trakesten du.

Arropa hartu eta komunera joaten da han janzteko.

cate barrez ari da ogitartekoak jaten dituen bitartean.

ian itzultzen da, guztiz jantzita.

 

ian: Lanik baduzu?

 

cate: Ez.

 

ian: Zerga-ordaintzaileak izorratzen jarraitzen duzu.

 

cate: Dirua amak ematen dit.

 

ian: Zu noiz hasiko zara zure kabuz bizitzen?

 

cate: Publizitate agentzia batean lan egiteko aurkeztu naiz.

 

ian: (Barrez zinez.)

          Ez duzu aukerarik izango.

 

cate: Zergatik ez?

 

ian: (Barreari utzi eta cateri begiratzen dio)

          Cate. Leloa zara. Lana ez duzu inoiz lortuko.

 

cate: Lortuko dut. Ez naiz leloa.

 

ian: Seguru.

 

cate: Gel- gelditu. Nahita ari zara.

 

ian: Nahita zer?

 

cate: Ni na- nahasten.

 

ian: Ez, hizketan nago, zu hau ulertzeko ez zara oso betea.

 

cate: Banaiz, banaiz.

 

cate dardarka hasten da. ian barrez dago.

catek konortea galtzen du.

ianek barreari utzi eta zerraldo dagoen gorputzari begira dago.

 

ian: Cate?

 

(Emakumea irauli egiten du eta betazalak altxatzen dizkio.

Ez daki zer egin.

Edalontzi bat gin hartu eta aurpegia zipriztintzen dio.)

 

cate: (Salto batez altxatzen da, begiak irekita ditu baina konorterik gabe jarraitzen du.)

 

ian: Ostia redios.

 

cate: (Barrez lehertzen da, era ez-natural batez, histeriko, kontrolik gabe.)

 

ian: Utzi izorratzeari.

 

cate: (Berriro kolapsatu eta mugimendurik gabe etzanda geratzen da.)

 

ian haren ondoan dago nola lagundu jakin gabe.

Handik gutxira, cate bere onera etortzen da, goizean esnatuko balitz bezala.

 

ian: Ze demontre izan da hori?

 

cate: Emakumeari esan behar diot.

 

ian: Cate?

 

cate: Arriskuan dago.

 

(Begiak itxi eta bere onera etortzen da.

iani begiratu eta irribarre egiten dio.)

 

ian: Orain zer?

 

cate: Konortea galdu dut?

 

ian: Benetakoa zen?

 

cate: Denbora guztian gertatzen zait.

 

ian: Zer, alditxarrak?

 

cate: Aita itzuli zenetik.

 

ian: Min ematen al dizu?

 

cate: Denborarekin pasatuko zaidala dio sendagileak.

 

ian: Nola zaude?

 

cate: (Irribarrez.)

 

ian: Hilda zeundela uste nuen.

 

cate: Horixe ematen duela sumatzen dut [nik].

 

ian: Berriro ez egin, izutu nauzu, ostia.

 

cate: Ez dakit zer esan, burua joaten zaidala besterik ez. Minutu edo batzuetan hilabete batzuk kanpoan egon naizela ematen du, gero aurreko tokira itzultzen naiz.

 

ian: Izugarria izan da.

 

cate: Ez naiz oso urrunera joan.

 

ian: Eta itzuliko ez bazina?

 

cate: Ba ez dakit. Han jarraituko nuke.

 

ian: Ez dut hori aguantatzen.

 

(Hozkailutxora doa, beste gin luze bat zerbitzatzen dio bere buruari eta zigarro bat pizten du.)

 

cate: Zer?

 

ian: Heriotza. Ez egote hori.

 

cate: Lotan geratzen zara eta gero esnatu egiten zara.

 

ian: Nola dakizu?

 

cate: Zergatik ez diozu erretzeari uzten?

 

ian: (Barreak.)

 

cate: Utzi beharko zenioke. Gaixotuko zara.

 

ian: Beranduegi da horretarako.

 

cate: Zutaz pentsatzen dudan bakoitzean zigarroarekin eta ginarekin zaude.

 

ian: Primeran.

 

cate: Arropak usaina hartzen du.

 

ian: Eta hatsak zeresanik ez.

 

cate: Irudikatu zure birikek ze itxura izango duten.

 

ian: Ez ditut irudikatu behar. Ikusita ditut.

 

cate: Noiz?

 

ian: Iaz. Nire onera itzuli nintzenean, zirujauak txerriki zati usteldu bat ekarri zidan, hura kiratsa. Nire birika.

 

cate: Birika kendu zizun?

 

ian: Bestea orain berdin dago.

 

cate: Baina hilko zara.

 

ian: Bai.

 

cate: Erretzeari utzi, mesedez.

 

ian: Ez du ezer hobetuko.

 

cate: Ezin dute ezer egin?

 

ian: Ez da zure nebarekin bezala, zaintzen baduzu onik aterako da.

 

cate: Goiz hiltzen dira.

 

ian: Izorratuta nago.

 

cate: Ezin dizute transplanterik egin?

 

ian: Ez izan memeloa. Bizi daitekeen jendeari egiten dizkiote horrelakoak. Umeei.

 

cate: Jendea istripuetan hiltzen da denbora guztian, izango dute baten bat soberan.

 

ian: Zergatik? Zertarako? Ni bizirik mantendu hiru hilabete barru zirrosiak jota hiltzeko?

 

cate: Zuk okertzen duzu daukazuna, azkartzen duzu.

 

ian: Ondo pasatzen ari, hemen nagoen bitartean.

 

(Zigarroa sakon arnastuta geratzen den gin hutsa irensten du.)

 

          Beltzingo horri deituko diot, gehiago ekar diezagun.

 

cate: (Dardarka.)

 

ian: Ikatz pusketa horrek ingelesa ulertzen duen jakin nahiko nuke.

 

cateren atsekabeaz konturatuta emakumea besarkatzen du.

Musukatzen du.

Emakumeak atzera bultzatzen du gizona eta ahoa garbitzen du.

 

cate: Ez sartu niri mingaina, ez dut gustuko.

 

ian: Barkatu.

 

Telefonoak oso ozenki jotzen du. ian durduzatzen da, gero erantzuten du.

 

ian: Kaixo?

 

cate: Nor da?

 

ian: (Entzungailua estaltzen du.) Ixx(o.)

          (Entzungailuan.) Hementxe daukat.

 

(Egunkarien pilatik ohar koadernoa hartu eta telefonoren bidez diktatzen du.)

 

          Serieko hiltzaile batek Samantha Scrace turista s- c- r- a- c- e akabatu zuen, hilketa erritual gaizberan, koma, atzo poliziak adierazi zuenez puntu eta bereiz. Leedseko hemeretzi urteko gazte poxpolina Zeelanda Berriko urrutiko basoan aurkitu zuten triangeluaren forma berdineko hilobietan lurperaturik zeuden beste zazpi biktimaren artean puntu eta bereiz. Biktima bakoitza hogei aldiz baino gehiagotan sastakatu eta ahoz behera paratu zituen koma, eskuak bizkarrean lotuta puntu eta bereiz. Letra larriak, aurkitutako errautsek argitara ekarri dute maniakoa otordua prestatzen bertan geratu zela, kendu letra larriak puntu eta bereiz. Samantha koma, modelo bilakatzea amesten zuen ilegorri ederra koma, bere bizitzako bidaia burutzen ari zen aurreko urtean unibertsitatean sartzeko azterketak bukatu ondoren puntu. Samantharen ama atsekabetuak atzo esan zuen bi puntu aipua, otoitz egiten dugu poliziak zerbait topa dezan gidoia, edozein gauza koma, laster puntua aipuak jarraitzen du. Ero hori justiziaren aurrean zenbat eta azkarren paratu orduan eta hobeto puntua aipua itxi puntu eta bereiz. Atzerri Ministerioak antipodetako turistei kontu handiagoz ibiltzeko eskatu die puntua. Bozeramaileak esan du bi puntu aipua, zentzuz jokatzea arau hoberena da puntu aipua itxi, testua amaitzen da.

 

(Entzuten ari da. Gero barre egiten du.)

 

          Horixe.

 

(Entzuten ari da.)

 

          Aurreko bera, ikustera joan nintzen. Liverpooleko puta hori, hankak zabaldu zituen. Ez. Ahaztu hori. Negar malkoak eta gezurrak, ez du espaziorik merezi.

 

(Telefonoko botoi bat zanpatzen du gela zerbitzuarekin konektatzeko.)

 

          Alua.

 

cate: Nola dakite hemen zaudela?

 

ian: Esan nien.

 

cate: Zergatik?

 

ian: Zer gerta ere, nire beharra baldin badute.

 

cate: Baboa. Horiengandik urrun egoteko etorri ginen hona.

 

ian: Gustukoa zenuela uste nuen. Hotel ederra.

 

(Erantzungailuan.)

 

          Botila bat gin igo, txo.

 

(Telefono-deia eten du.)

 

cate: Zure etxera joaten ohi ginen.

 

ian: Orain dela urte batzuk zen hori. Handitu zara.

 

cate: (Irribarre egiten du.)

 

ian: Ni jada ez nago ondo.

 

cate: (Irribarre egiteari uzten dio.)

 

ianek emakumea musukatzen du.

Emakumeak gauza bera egiten du.

ianek top-aren azpian eskua sartu eta bularraren ingurura hurbiltzen dio.

Beste eskuarekin bere galtzak askatu eta masturbatzen hasten da.

Neskaren top-a askatzen hasten da.

Neskak atzera bultzatzen du.

 

cate: Ian, e- ez.

 

ian: Zergatik?

 

cate: Ez dut egin nahi.

 

ian: Bai, nahi duzu.

 

cate: Ez.

 

ian: Zergatik ez? Urduri zaude, hori da.

 

(Emakumea berriro musukatzen hasten da.)

 

cate: E- e- e- e- e- e- ezetz esan dizut. Benetan gustukoa zaitut baina e- e- e- e- ezin dut egin.

 

ian: (Emakumea musukatzen.) Ixxx(o.)

 

(Emakumeari prakak eranzten hasten zaio.)

 

cate izuak hartuta.

Dardarka hasten da eta artikulatu gabeko negar zotinak egiten ditu.

ian gelditzen da, beste krisialdi batek eragingo diolako beldurrez.

 

ian: Ondo dago, Cate, ondo dago. Ez dugu ezer egin behar.

 

Aurpegia laztantzen dio lasaitzen den arte.

Neskak bere erpurua zupatzen du.

Orduan.

 

ian: Hori ez da oso zuzena izan.

 

cate: Zer?

 

ian: Eten didazula, memelo bat bezala utzi nauzula.

 

cate: S- s- sentitzen nintzen —

 

ian: Ez errukitu nitaz, Cate. Ez didazu larrutan egin behar hiltzen ari naizelako, baina ez igurtzi zure alua aurpegian eta gero alde egin mingaina sartu dizudalako.

 

cate: I- I- Ian.

 

ian: Zer duzu?

 

cate: M- m- musukatu zaitut, besterik ez. Gustukoa zaitut.

 

ian: Ez hasi nirea tentetzen bukatzen ez baduzu. Min ematen du.

 

cate: Barkatu.

 

ian: Ezin naiz berotu eta hoztu horrela. Isurtzen ez banaiz zakilak min ematen dit.

 

cate: Ez nuen horrelakorik egin nahi.

 

ian: Kaka zaharra. (Min handiz dagoela ematen du.)

 

cate: Barka. Barkatu. Ez dut berriro egingo.

 

ian, oraindik minez antza, emakumeari eskua hartu eta zakilaren kontra heltzen dio, bere eskua emakumearenaren gainean mantentzen duela.

Horrela masturbatzen da, benetako minez isurtzen den arte. cateren eskua askatu eta aldentzen du.

 

cate: Hobeto horrela?

 

ian: (Buruaz baietz dio.)

 

cate: Barkatu.

 

ian: Lasai. Gauean amodioa egingo dugu?

 

cate: Ez.

 

ian: Zergatik ez?

 

cate: Ez naiz zure neska-laguna jada.

 

ian: Eta ez zara berriro izango?

 

cate: Shaun-i esan nion berea izango nintzela.

 

ian: Berarekin oheratu zara?

 

cate: Ez.

 

ian: Nirekin lehenago oheratu zinen. Harena baino nireagoa zara.

 

cate: Ez naiz.

 

ian: Orduan, kanpaia jo didazu, zer dela eta?

 

cate: Nik e- e- e- ez.

 

ian: Barkatu. Estresa, estresa. Maite zaitut, hori da.

 

cate: Oso gaizki jokatu zenuen nirekin.

 

ian: Ez nuen gaizki jokatu.

 

cate: Ez zenidan berriro deitu, ez zenidan inoiz zergatia azaldu.

 

ian: Zaila zen, Cate.

 

cate: Lanik ez neukalako?

 

ian: Ez, laztana, ez zen hori.

 

cate: Nebagatik?

 

ian: Ez, ez, Cate. Utzi hori orain.

 

cate: Ez da bidezkoa.

 

ian: Uzteko esan dizut.

 

(Errebolberra eskuratzen du.)

Atean norbait joka dago.

ian durduzatzen da, gero irekitzera doa.

 

ian: Ez zaitut minduko, utzi hori. Eta isilik egon. Gure kedarra izango da, zerbait jasotzera.

 

cate: Andrew.

 

ian: Zertarako jakin nahi duzu negrata baten izena?

 

cate: Atsegina iruditu zait.

 

ian: Haragi zati beltz baten atzetik, e? Nirekin ez duzu egingo baina uher batekin joango zinateke.

 

cate: Nazkagarria zara.

 

ian: Cate, maitea, zu zaintzen saiatzen ari naiz. Min egin ez diezazuten.

 

cate: Zeuk mindu nauzu.

 

ian: Ez, nik maite zaitut.

 

cate: Utzi ni maitatzeari.

 

ian: Hori uzteko esan dizut.

          Orain.

 

Sutsuki musukatzen du, gero atera doa.

Gizona bizkarrez dagoenean, emakumeak ahoa garbitzen du.

ianek atea irekitzen du. Kanpoan erretilu batean gin botila bat dago.

ianek barrura sartzen du eta zutik geratzen da, xanpainaren eta ginaren artean ezin erabaki.

 

cate: Xanpaina edan, hobe da zuretzat.

 

ian: Ez dut ezer hoberik nahi.

 

(Gina zerbitzatzen dio bere buruari.)

 

cate: Azkarrago hilko zara.

 

ian: Eskerrik asko. Ez dizu beldurrik ematen?

 

cate: Zerk?

 

ian: Heriotzak.

 

cate: Norenak?

 

ian: Zureak.

 

cate: Amagatik bakarrik. Hilko banintz goibelduko litzateke. Eta nebagatik.

 

ian: Gaztea zara.

          Zure edadekoa nintzenean —

          Orain.

 

cate: Ospitalera joan beharko duzu?

 

ian: Ezin dute ezer egin.

 

cate: Stellak badaki?

 

ian: Zertarako esan nahiko nioke?

 

cate: Ezkonduta egon zineten.

 

ian: Eta?

 

cate: Jakin nahiko lukeela.

 

ian: Akelarrean ospatzeko lagunekin.

 

cate: Ez luke horrelakorik egingo. Eta Matthewrekin zer?

 

ian: Matthewrekin zer?

 

cate: Esan diozu?

 

ian: Elizkizunerako gonbidapena bidaliko diot.

 

cate: Gaizki hartuko du.

 

ian: Gorroto dit.

 

cate: Ez. Ez dizu.

 

ian: Bai, joder, gorroto dit.

 

cate: Atsekabeturik zaude?

 

ian: Bai. Ama lesbiana du. Ez naiz ni hori baino aukeragarriagoa?

 

cate: Baliteke pertsona jatorra izatea.

 

ian: Ez du pistolarik eramaten.

 

cate: Hori izango da.

 

ian: Stella maite nuen sorgin bihurtu eta mari-mutil batekin larrutan ibili zen arte, eta zu maite zaitut, nahiz eta zuk gaitasun guztia daukazun.

 

cate: Zertarako?

 

ian: Pototatxoak zupatzeko.

 

cate: (Artikulatu gabeko soinu bat ateratzen du.)

 

ian: Ez duzu inoiz emakume batekin larrutan egin?

 

cate: Ez.

 

ian: Egingo zenuke?

 

cate: Ez dut uste. Zuk egin duzu? Gizon batekin.

 

ian: Zakiljalea naizela uste duzu? Ikusi didazu (Hankartea arinki seinalatzen du.) Nola uste dezakezu horrelakorik?

 

cate: Ez dut. Galdetu egin dizut. Zuk niri galdetu didazu.

 

ian: Lesbiana bat bezala janzten zara. Ni ez naiz janzten zakiljale bat bezala.

 

cate: Nola janzten dira, bada?

 

ian: Hitler erratu egin zen queer jendearen kontra egin zuten juduekin beste haien aurka joan beharko zukeen zorri haiek eta negratak eta futbolzale madarikatuak bonba-hegazkina bidali Elland Roadera eta guztiak akabatu.

 

(Bere buruari xanpaina zerbitzatzen dio eta topa egin du bere ideiaren alde.)

 

cate: Futbola gustuko dut.

 

ian: Zergatik?

 

cate: Gauza ona da.

 

ian: Eta noiz da futbol partidua ikustera joan zaren azkenengo aldia?

 

cate: Larunbatean. Unitedek Liverpooli irabazi zion bi eta huts.

 

ian: Labankadarik ez zenuen jaso?

 

cate: Zergatik baina?

 

ian: Futbola hori da. Ez da oinen dantza eta golak sartzea. Tribuzaletasuna da.

 

cate: Gustuko dut.

 

ian: Jakina. Zure mailako zerbait da.

 

cate: Noizbehinka Elland Roadera joaten naiz ni. Bonbarik botako zenidake?

 

ian: Zertarako egin nahi didazu horrelako galdera bat?

 

cate: Botako zenuke baina?

 

ian: Ez izan txoropitoa.

 

cate: Baina egingo zenuke?

 

ian: Ez daukat nik bonba-hegazkinik.

 

cate: Orduan tiroka nazazu. Gai izango zinateke?

 

ian: Cate.

 

cate: Baten bat tirokatzea gogorra dela uste duzu?

 

ian: Kaka odolustua libratzea bezain erraza.

 

cate: Tirorik botako zenidake?

 

ian: Tirorik botako zenidake utzi hori galdetzeari tirorik botako zenidake tirorik botako zenidake.

 

cate: Ez dut uste.

 

ian: Min hartuko bazenu.

 

cate: Ez dut uste egingo zenukeenik.

 

ian: Baina egingo banu.

 

cate: Ez, zu sentibera zara.

 

ian: Maite dudan jendearekin.

 

(Emakumeari begira geratzen zaio, musukatu bai ala ez pentsaketan.)

 

cate: (Irribarre egiten dio, adiskidetsu.)

 

ian: Orduan, zein da lan hori?

 

cate: Laguntzaile pertsonala.

 

ian: Norena?

 

cate: Ez dakit.

 

ian: Eskutitza nori zuzendu diozu?

 

cate: Jaun/andre idatzi nuen.

 

ian: Jakin behar duzu nori zuzentzen diozun.

 

cate: Ez zuen esaten.

 

ian: Zenbat?

 

cate: Zer?

 

ian: Dirua. Zenbat ordainduko dizuten.

 

cate: Amak pila bat zela esan zidan. Ez zait inporta noizbehinka irteteko nahikoa badut.

 

ian: Ez mespretxatu dirua. Aisa lortu duzu zuk.

 

cate: Nik ez dut dirurik.

 

ian: Ez, hazteko seme-alabarik ere ez.

 

cate: Oraindik ez.

 

ian: Ez, ezta okurritu ere. Nork nahiko luke seme-alabak izatea. Umeak izaten dituzu, hazten dira, gorroto dizute eta hiltzen zara.

 

cate: Nik ez dut ama gorroto.

 

ian: Oraindik haren beharra duzu.

 

cate: Baboa naizela uste duzu. Ez naiz baboa.

 

ian: Kezkatzen nauzu.

 

cate: Nire burua zaintzeko gauza naiz.

 

ian: Ni bezala.

 

cate: Ez.

 

ian: Gorroto didazu, ezta?

 

cate: Ez zenuke pistola hori eraman behar.

 

ian: Agian beharko dut.

 

cate: Zertarako?

 

ian: (Edaten du.)

 

cate: Ezin dut hori irudikatu.

 

ian: Zer?

 

cate: Zu. Baten bat tirokatzen. Zuk ez zenuke ezer akabatuko.

 

ian: (Edaten du.)

 

cate: Inoiz inori tiro egin al diozu?

 

ian: Zure buruari.

 

cate: Baina egin duzu?

 

ian: Utzi hori, Cate.

 

 

catek abisua ulertzen du.

ianek emakumea musukatu eta zigarro bat pizten du.

 

ian: Zurekin nagoenean ezin dut beste ezertan pentsatu.

          Beste nonbaitera eramaten nauzu.

 

cate: Alditxarrak harrapatzen nauenean bezalakoa da.

 

ian: Zu besterik ez.

 

cate: Mundua ez da existitzen, ez honelaxe.

          Mundu bera dirudi baina —

          Denbora mantso doa.

          Ametsak harrapatuta nauka, ezin dut ezer egin.

          Egun batean —

 

ian: Egidazu amodioa.

 

cate: Beste guztia gelditzen da.

          Behin —

 

ian: Amodioa egingo dizut.

 

cate: Neure burua ukitzen dudanean bezalakoa da.

 

ian deseroso sentitzen da.

 

cate: Hasi baino lehen nolakoa izango den irudikatzen dut, bukatu bezain pronto hurrengoari buruz pentsatzen hasten naiz, baina gertatzen ari den bitartean zoragarria da, ez dut beste ezertan pentsatzen.

 

ian: Eguneko lehenbiziko zigarroarekin bezala.

 

cate: Baina hori kaltegarria da zuretzat.

 

ian: Isildu zaitez behingoz, ez dakizu ezer ere.

 

cate: Ez dut ezer jakin behar.

 

ian: Ezer ere ez dakizu. Horregatik maite zaitut, horregatik amodioa egin nahi dizut.

 

cate: Baina ez didazu egingo.

 

ian: Zergatik ez?

 

cate: Nik ez dut nahi.

 

ian: Zergatik etorri zara hona?

 

cate: Goibel ematen zenuen.

 

ian: Bilaka nazazu zoriontsu.

 

cate: Ezin dut.

 

ian: Mesedez.

 

cate: Ezetz.

 

ian: Zergatik ez?

 

cate: Ezin dut.

 

ian: Ahal duzu.

 

cate: Nola?

 

ian: Badakizu.

 

cate: Ez.

 

ian: Mesedez.

 

cate: Ezetz.

 

ian: Maite zaitut.

 

cate: Nik ez zaitut maite.

 

ian: (Bizkarra ematen dio. Lore sorta ikusi eta hartzen du.)

          Zuretzat dira.

 

Ilunaldia.

 

Udaberriko euriaren soinua.