Poesia kaiera
Poesia kaiera
Forugh Farrokhzad
itzulpena: Miren Agur Meabe
2020, poesia
64 orrialde
978-84-17051-42-6
Forugh Farrokhzad
1934-1967
 
 

 

Bainua

 

Biluztu egin nintzen eguraldia alde zela,

nire gorputza iturbegian garbitzeko.

Gau isilak ziri egiten zidan

bihotzeko pena iturriari kontatzeko.

 

Ur freskoak eta olatu lirlartsuek

pozik inguratu ninduten, murmurka.

Tenk egin zien nire gorputz-arimei

beren atzamarren kristalak.

 

Haize kirriak, asagotik etorrita,

lorezko mantelina zabaldu zidan ilean.

Mendafinaren lurrin atsegina

ekarri zidan haize arinak.

 

Arima arindurik, begiak itxi

eta gorputza estutu nuen belar samurraren kontra.

Emakume bat amorantearen besoetan nola,

iturriaren esku jarri nuen neure burua.

 

Uraren ezpain dardartiek

artega, egartsu, parogabe

musukatu zizkidaten hankak.

Eta bet-betan endredatu ziren horditurik

nire gorputza eta iturriaren arima barrabana.