Itsastxorien bindikapena

Aizu, Pablo,

gorroto dut bakearen usoa

zeure usoa

Lapurtu egin digute

ohostu, ebatsi

nik dakit zein aditz erabili!

Pablo apostoluak

zalditik erori eta

jainkoaren argia ikusi

                      omen zuen

geu ere lurrean hankaz gora

inongo argirik ikusi ezinik

ez bada

kriseilu humilak opaltzen diguna

Gehiagorik ez da behar

hain gauza sinplea ikusteko

lapurtu egin digute usoa

orain hainbeste gorroto dudan usoa.

«Guernica» ere kaiolatu egin dizute

Madrilen

armaz defendatuko Madril horretan

odolez laztandutako Madril gorrian

izerdiz ezkerretakoa bataiatutako Madril ateoan

Madril galduan baino.

Ezin zitekeen

beste ezein modutara izan

Esan dizut, Pablo,

gorroto dugu uso prostitutatuori

Orain koadroa amaitzen ari gara

beste Picasso asko

Gernika bat egiten

bakoitza Picasso bat bagina bezala

zuk ez bait zenuen

astirik izan amaitzeko

koadro bat pintatuz ez bait da

inoiz

gerrarik amaitu

eta zuk

koadroan

gerra jaso zenuen

notario jaioa zinen horretarako

gerra ez da amaitu

koadroa ere ez

Guernica deskaiolatua, librea

Gernika jareinean

koadroan amai

daitekeen

toki

bakarrean

Bitartean

lapurtu egin dizute usoa

Federico, Pablo, Luis, poeten Madril berritsuan

«Noche de guerra en el museo del Prado»

berrantzeztu beharko genuke

ea oraingoan geuk irabazten dugun zure indar guztiak han barruan izanik

«Noche de guerra en el museo del Prado»

baina inor ez da errepikatzen

          historia ez da errepikatzen

  «Guernica»n usoak

    sobera zeuden

    bai, horixe

    orain bezala.

Bestela zeuk esango didazu Pablo

zer egin dezakeen usoak

uniformez jantzita, hanketatik Poturik (loturik?)

botaurreko ilundunen morroi beltzen eskutik

Bai, Pablo

orain ordaindu egin behar dugu zure «Guernica» ikusteko

kaiolatua

kristalezko kaiolan (poesigai izan dugun kristala zure magiaren kaiola)

«Guernica» ez dago Gernikan

Gernika gartzelatu batetan

ez bait da

horrenbeste askatasunik

horrenbeste askatasun minik karraixika

kabitzen

Guernica kaiolatua ez da Gernika kartzelatuan kabitzen

nire begiez ez dut sekula halako itsuskeriarik ikusi

nola erabil litekeen usoa

zapaltzeko

Pablo, beste txori bat behar dugu

libertarioa

sekula kaiolatu gabea

puroa

nahiz eta hondakin odoltsuak jan

hegalari asperezina

gure askatasun minaren egarriaren irudia

lehenengo askatasuna delako

eta

gero

bakea

Hegazti hori itsasoan da

hara naramate nire oinek

bertara doa nire gogoa ere

kresal bizikorra irenstera

eguzkiaren eta urgaziaren

lurrezko emaitza birjinala

Harea igurikatzen nauzu

eta

bizitza bera den egonezina

Itsastxorien egonezina Pablo