DENBORA MAKINA

eskutik heldu eta bertara eraman zaitut

hatza luzatu bigarren solairura

barautsa denborari txirbila ateratzen

iraganaren atean mirail bat

hor bizi naiz ikasle garaian oraindik

hor nago helduen artean ernatu berri

hautsontzian erreta kafea eta gitarra akorde okerrak

argindarra mahai gaineko flexotik nire burmuinera

mundu berri baterako fisika proposamenak apunteetan

elektroi eroak biraka amets berrien orbitetan

hor ikasi nahi ez genituen ikasgaiak

gaizki askaturiko problemen ezabagoma hondarrak

apalean elektronika digitaleko lana

gogoan dut irakaslearen izu aurpegia

programazio akats bat tarteko

atzerantz zihoan ordularia ikusi zigunean

tapa jarriko diogu zuloari

egin dezagun ospa hemendik lehenbailehen

izerditan esnatuko naiz bestela gauean

ondo prestatu gabeko azterketa haren erdian