ANTZO-MENDIKO BILLARRA

Antzo-mendi tabernara

joaten ginen mutil koskorretan.

Lokala handia zen

eta billar bat zeukan erdian.

Oholezko zorua.

Entzuten zen Velvet Underground,

Ziggy Stardust.

Atzealdean gazteak egoten ziren,

bankuetan eserita eta berbetan.

Mutilak ileak kolorez,

larruzko praka eta takoiekin.

Neskak ileak gora eta

leopardozko elastikoekin.

Billarrean irabazten zuenak

nagusiekin jokatzen zuen ondoren.

Horregatik nahi izaten nuen gailendu,

beraien aurka aritzeko.

Makilaz bola jotzean

beren lepoko kateek eta pultserek

soinua ateratzen zuten.

Batzuentzat deabru hutsak izango ziren,

baina niretzat aingeruak.

Haiekin ikasi nuen hegan egiten.