AHUR HUTSAK

aurrez aurre ekarri nahi ditut nire esanak

betzuloetan elurbilduak ditudala dakartzat

oinaze osteko ubera eta odolustearen isuria

zu zara hori uler dezakeen bakarra

ordainik jaso gabe egin nahi dut aldarri

bakeak egin ditut ilunarekin

noizbait pozaren gogoramen apurra

sentitu izan dut bihotz-zolan

eta beti pentsatu izan dut

helburu ederrenak ere baduela bere muga

inork ez daki zenbat iraunen duen hutsarte honek

baina nire ahurrak hutsik daude inoiz ez bezala

debekuaren zigorra ezagutu dute

destainaren indiferentzia nozitu

desioaren orbana laztandu

haatik hutsik daude orain nire ahurrak

eta errugabetu nahi nituzke

errugabetu galtze guztien erruduntasunetik