Poesia kaiera
Poesia kaiera
2001, poesia
64 orrialde
84-95511-28-2
Pako Aristi
1963, Urrestilla
 
2016, poesia
2014, poesia
2003, poesia
 

Garenaz gaindi

 

Ni naiz

      Pello Lizarralde

                        izan nahi zuen

                                    gizona,

agian

Pello Lizarraldek berak

artean Pello Lizarralde

izan nahi ez zuen garaian.

Bekainen marrarekin batera

ematen baitzaigu izana ere,

eta izanera horri eustearen edota

gizartearekin samurrago letorkeen

beste batera makurtzearen arteko

borrokari

agian

bizitza esan lekioke.

Hona Pello Lizarralde:

(Zumarraga, 1956)

lanik egin gabe bizi nahi eta

urtebeteko eszedentzia hartu zuen,

idazteko, munduan zehar ibiltzeko,

benetako plazerra irakurtzea dela

(eta ez idaztea)

deskubritu zuen arte.

Urri idazten du,

eginbeharrek uzten dioten

denbora are urriagoan

(zinera ere joan beharra baitago);

nobela laburrak, ipuin laburrak,

hatz artean

kotxe-aseguruen

gutunantzeko lodiera duten

liburuak erdituz.

Gogoa duenean soilik idazten du,

eta oraingoz ez dauka

egunero bost orduz lehertzeraino

bere burua murgilaraziko dion

nobela pisutsua idazteko gogorik.

Ez zuen Idazleen Elkartean

izena eman,

uste baitu (Hemingwayren antzera

eta idazle gazteei exenplua emanez)

sari-elkarte guztiek idazleari

bakardadea arintzen laguntzen diotela,

baina ez hobeto idazten.

Haserretu egiten da

«puenting», «surfing» eta antzekoak ikasi

eta hitz zaharrak ahanzten dituztenekin:

udaberri oso bat eman zuen

ipuinen batean

«ezkerraihena»rentzat leku bila.

Hain da gozatsua idaztea,

eta hain astuna idatzitakoa defendatzea!

Ni naiz

      Pello Lizarralde

                      izaterik lortu

                                    ez zuen gizona,

agian Pello Lizarralderen beraren ezinustean:

garenaz gaindi ezin ihes egin,

asteko egun bakoitzak

izaeran bere markaren azalerrea

itsasten digun bezala.

Hemen datza

                Pello Lizarralderen

                                      bekaitzaz

ahi gelditutako gizona,

agian

Pello Lizarraldek berak

Pello Lizarraldez horrelakorik

sentituko ez lukeenean,

bekaitza ez baita

(bizi-modu bat bilakatzen ez den artio)

beste-lakoa izan nahiak

eragiten digun barren-ekaitza

besterik.

 

w1998