SIBILAREN AUHENA

Ez zitzaizkion erantzun osoak sekula bururatu

Egia esan hiltzeko era ugari daude

eta hilobiak aurkitzeko ere denbora behar da baina

ez zitzaizkion erantzun osoak sekula bururatu

Telefonoaren bestaldean

kazetariak galdetu zion elkarrizketa amaitu aldera

nola hil nahi zuen

—egoera hipotetikoan beti ere—

aukeratzerik balu halako momentuan

Ez zuela horri buruz pentsatu

aitortu nahi zion

azken aldian kontzentratuta zebilela

biriketan airea pilatzearekin

inoiz baino biziago sentitzen zela

eta ezin sinetsirik zebilela

inoiz begiak bilduko zituenik betiko

baina bazekien ez zela guztiz egia nahiz eta

ez zitzaizkion erantzun osoak sekula bururatu

Gloriaz oroitu zen

Harriak ipini zituen telefonoen artean

hitz eskasia saihesteko

"Begiak itxita" pentsatu zuen

baina inozokeria zen hura

Hodeien usainaz edo

uraren hezeaz galdegitearen pareko iruditu zitzaion

Lotsa sentitu zuen horregatik

"Ez nuke lotsaz hil nahi" aitortu zuen biribil

lehen sentitutakoarekin lotze aldera

Ez zion kazetariari harridurarik sumatu

Elkarrizketa amaitzen ari zela zirudien

gauerdian egunsentia usaintzea zen hura

itzultzen den legioaren zuziak ukitzea

"Ez nuke lotsaz hil nahi" errepikatu zuen

eta egiazkoa zirudien isiltasuna entzun zuen gero

© Jon Benito