AZKEN GUDAROSTEA

Kapitainak badaki zergatik aukeratu duten

eta azken itxaropena da eurentzat

Badaki gerraren egoerarik krudelenak

hurbilduko direnean

arima ahulduko zaiela soldaduei

etsaien artean ere elkar besarkatuko dutela

Zirku dramatiko honen domadore hautatu dute

jakinik inor gutxik behar dituela heroiak gaur egun

Gidariek ere nekez topatzen dute lan

anbulantzietan ez bada

Kapitainak ez du atzerako deirik egingo

Lehen armarik ez zenean

gorrotoak iraunarazten zituen

orain armak badituzte baina ametsik ez

ezintasunak eta beldurrak mantentzen ditu tinko

Kapitainak badaki ez dela galtzaileen historiarik

erresistentzi ahaleginak baizik

tigrearen azkurak direla eurenak

Egunsentiko erasoetan hil ziren lehen soldaduak

gero gosea hotza eta nekea etorri ziren

indefentsioa indartzera

Hasierako egunetan lurperatu egiten zituzten

hildako lagunak

ondorengoak lur gainean flotatzen uzteko

Batzuek euliak dituzte biriketan

besteak pagadian galdu ziren apropos

Soldaduak bizikletak bizkarrean dituztela doaz

maldan gora

Heriotzak markatzen ditu etsaiaren lerroak

eta kapitainak ez du atzerako deirik egingo

© Jon Benito