GALDEKETA

Non daude pozaldi horailetatik

batzeko ginen taupada hordigarri haiek?

Non, belaontzien ezpalez

eraikitzekotan ginen sutondo ibiltaria?

Non dago tigreen marrekin

dekoratu nahi genuen aberri berria?

Non, iraganaren magalari atximurka eginez

berretsi gura genituen gure paisajeak?

Non da lehen ohe hartako erloju ezberdina?

Non galdu dugu misterioaren ura,

zeinahi utopia bedeinkatzeko balio ziguna?

Non gorde duzu irudimenaren maleta?

Zer dago orain barruan?

© Miren Agur Meabe