DIAGNOSTIKOA

Eritasun hau degeneratiboa da.

Gorputzeko ehun komunikatiboak suntsitzean datza:

azala uzkurtzean

(ferekekiko sentikortasuna galduz),

ikus-fokua murriztean

(irakurgai dugun liburuaren esparrura mugatuz).

Mintzatzea ere neketsua zaigu

eta berba bat ahoskatzen dugunero,

pseudopodo gris luzez hornituta jaiotzen da

eta egongelan zintzilik geratzen,

bere patua horixe bailitzan:

oherako orduaz ezer ez dakien ameba bakana izatea.

Belarria kalteturik, gotorlekuan gaude, gor.

Dasta-papilak eta mihia elbarriturik, nagi.

Sudurzuloak antena bilakatu,

eta segituan hautematen dugu

kexu baten erre-sunda edo erdeinuaren enpagu-hatsa.

Diagnostikoa:

isiltasun-minbizi ziklikoa.

Inkubazioaldia:

eroapena praktikatzeke pilaturiko aldikadak.

Maiztasuna (barkamenaren zientziak soluziorik

deskubritu ezean):

elkarren ondoan poto egin bezainbeste bider.

Profilaxi-tratamendua:

afari bat jatetxe polit batean, noizean behin,

eta goizero-goizero

pentsamendu alairen bat egun on esatean.

© Miren Agur Meabe