Miren Agur Meabe - Azalaren kodea

METAMORFOSIA

Narrastiak daude zure berben ostean,

zizt eginaz batera ezkutatzen dakiten sugeak.

Zu zeu oso-osorik bihurtzen zara ofidio zantar

eraso egitera oldartzen zarenean:

txinpart horiak nini hanpatuetan,

sugar moreak hobi izoztuetan,

pozoi beltza letagin zorrotzetan.

Sexua ere mizto gorri zaizu bihurtzen.

Amorruz kiribiltzen zatzaizkio nire isilaren koldarrari,

mespretxuz zipriztindu gura duzu nire egote mutua.

Lasai, maitea.

Ez nauzu irentsiko.

Lasai, laztana.

Gehien ere, borrokan galduriko ezkata zurrun apurrak

geratuko dira airean sakabanaturik,

dirdai-dirdai bion hizketan.