HARMONIAREN IZENEAN

Lasai

azken zigarroa itzaltzen duzun egunean

arima ez da zure aurka gehiago altxatuko:

kristalezko zerbait erori

eta apurtzen bada

alferrik da konpontzen saiatzea.

Eskuetan zauriak irekiko dizkizu.

Elaiek ere hotzarekin egiten dute alde

atzean isiltasuna utziz.

Pausoa eman behar zenuke.

Harmoniaren izenean eskatzen dizut

pausoa emateko.

Berdin zait modua baina egizu.

Hemen dagoeneko gorrotoa baino ez duzu pizten.

Tristea da zu horrela ikustea

suizida frustratu baten antzera

eskailerak igo eta igo

solairuak kontatu eta kontatu

inoiz azoteara

iritsi

ezinik.

© Igor Estankona