LURRALDE BERRIAN

Atzean utzi nahi duzu sufrezko denbora

eta ahalegin horretan

maite zaituztenen lepoak erretzeko

prest zaude.

Hori ez da txarra.

Ez dizut beraiengatik esaten.

Beraiek ere zu bezala orbita egokiaren bila ari dira.

Alferrik delako esaten dizut.

Ihesa delako sentimenturik bakunena.

Bidearen bukaeran ez dago hormarik ez aduanarik.

Lurralde berrira erraz sartzen da jendea.

Usainduz eta usainduz zaporea hartzen zaio.

Tigre bat ikusiko duzu

izar iheskor batetik edaten

baina

lurralde berrian ere

berdin

sentituko zara.

Zurekin joango zara zu etengabe.

© Igor Estankona