BIZITZAREN JABETZA GORPUTZEN GAIN

Haizearen atzamarrekin zure gorputza

esploratzen

interruptorearen bila

zentimetro karratu erogenoen bila

lautada guztiak

zokogune bakoitza

birkreatuz asmatuz marraztuz

nigandik irtengo balira bezala zure bazterrak

eta ilargiak zainetan itsasgorak sortu

algak ekarriz ileekin nahas daitezen.

Tinpanoa harizpi apurkorrena

kaltetzeko beldurrez

uraren tonoa aukeratzen dugu

iluntasunean elkarri hitz egiteko.

Izerdiak arrainak izan ginela

gogorarazten digu

eta leihoak

egun-argi dela.

Orduan begirada infinitutik gauden lekura

itzultzen dugu emeki.

© Igor Estankona