MARGARITA BORTITZAK ETA UTERORA ITZULI

                                      Iraupena: 1'19"

Hasberriak gara iluntasun honetan

bizitzak kolpe bakar batez deskorapila gaitzake

eta ederra bezain hutsala da ahalegin hau

nola ukitzen duten hala ere elkar gure bakardadeek

gure melodrama luzeek.

Kapital patetiko hori bildu eta euripean goaz.

Zoritxarrekoak lehen ere baginen

baina orain kontzienteak gara.

Nik ez diat ezer konprenitzen ahal

esango diogu heriotzari

kristautasun formei uko egin ondoren beldurrez

kaka eginda

pilotutasuna sentipen atsegina zelakoan

bonben gainean egote horrek gerra

desagertaraziko balu bezala.

Ilargi gehienak erori dira

hain gaude nekatuta hain haginka egingo nizuke mingainean

egunero zeharkatu behar gutaz eginiko tunel zaharra

kateak aspaldi kendu zizkiguten

baina orain

gu geu gara gu geu atea-zabaldu-nahi-ez-dugunak

argia gorroto dugunak.

Eztabaida bizantziarretan sartuta gabiltzan bitartean

mundua sumin purifikatzaile bete-betean dago.

Ez da faltako bolondresik gu hiltzeko.

Moskuren aginduak zehatzak dira.

Esan ez dutela honaino etorri beharrik.

Esan lana erraztuko diegula gutxienez.

© Igor Estankona