GAUA ORAINDIK BATAILA IRABAZI BARIK

Txori-habiak sexu abegikorren antzera daude

abar artetik zafirozko sabaira begira.

Isilik esne epelez betetzen dira bularrak.

Urreak labain egiten du eguzkiarekin aurpegian.

Eguna gero eta beherago dator.

Ez dago inor instantea harrapatzeko eta hala ere

azken izpiek limoizko haziak ereiten dituzte

biharko...

Esan,

zeren beldur zara,

urreztatuz bazoaz ibili ahala?

Ikus ditzakezu itsasoko izarrak zeruan islatzen

eta iluntzea urtean behin sekula-belar bihurtzen.

Nabigakorra da paisajearen tristezia.

Galderak gari bihurtu dira bideetan.

Urak luma bat izan zitekeena daroa.

Bestela dena dago lasai.

Betiko moduan eltxoak argiaren bila.

Betiko moduan beldur gozo batek gidatzen ditu

izaki gehienak.

Inurri gorriek

lur azpiko barrunbeetan sartu

eta haurdun uzten dute mundua.

© Igor Estankona