Saminen barnetegi

Zanga honetatik irteteko zerez ekin, bihotzez herragaz

Inoiz ezintasun errime hau amaituko da

Eta horma arrakalatuok eta sentimentu atzenduak

Jaso beharko dira berriz

Konturatu naiz itoei ikasitako hizkuntzan mintzo naizela

Etsaiaren autobiografia ari naiz idazten

Eta mehetzen ari da nire argudioaren indarra

Zer dezake hezur hautsi batek nire arrazoibidearen urkamendian

Zer dezake gizon baten goseak nire askatasunaren paretan

Denok gara arbaso

Bertotik bai baina ez dugu bertara tiro eginen hurrengoan ere

Inoizko denboran sosegatzera egin beharko dute lasterkarien hiriok

Gu ultimatumei erantzuteko gagoz

Kondenatuari ukatu azken aukera gu gara

Izan ere badira deiadar batean baino adieraz ez litezkeen maitetasunak

Etxe lurmendatuen aurrean baino irakur ez litezkeen manifestuak

Eta gogora berantegi ekarritako gorputzak

Etxekoek ez gaituzte gehiago aldeztuko

Eta ibaiaren erriberak jitoak daramatza

Daitekeena da helburu zehatz bat aukeratzea hegazkinek

Jagon gabeko azken zerutik, baina amarratuta dagoz

© Jose Luis Otamendi