Gauez lo egin ezinik

Brodatuaren bestaldea / Le paysage c'est un état

                                 d'âme / Aintzinako haurra

munduaren tamainako globoa puzten / Panpinak

                  hilekoa dariela / Arrainak nasa gainean /

Como sao bonitos os marinheiros / Surik gabeko

                      sutondoa / Albiste onak itxadotea

dentistak hagina kentzen dizun artean / Rj rj rj /

                                Sutondorik gabeko etxea /

Etxerik gabeko bizilekua / Zakurraren belarri

                                       zuloan gainbizitzea /

Betaurrekoak lurrean / Bizitzen ikasi orduko

                                             hiltzen ikastea /

Saguak zelda bazterrean rj rj rj / Leku zikina

                                             gainera ilunetan...

Denbora den dortoka hori pausarik ia egin gabe

                                                   pasatzen da.

Haren maskorpean bizi arren, haren aldentzeari

                                           begiratzen diogu.

Erropa zikinak ikuztokian bezala pilatzen ditut

                                    lerrook pospoluen argipean,

ea kabitzen zaizkidan heldu den goizeko trasladoan,

                                    hogeita bost kiloko boltsan.

Dortokaren maskorra: urteen edalontzia.

                                       Gezala, herdoila, koralak.

Aihenelako hitz laburren bat asmatu:

                                             zugabakarrik.

Ahanzturan oroitarriak altzatu: baserri fabrikak

                           gure herriko haran berdeetan.

Desolazioa poesia deritzan hori bihurtu? It looks well

                           on the page / but never well enough

Alegra gaitezen ilunbeei begira, agian goizalba da

                                    Zelanda Berrian, antipodetan.

© Joseba Sarrionandia