Gutariko bat

                                                «He was one of us»

                                                      Joseph Conrad

Whydah hondartzako beltza aldamenean eramanez gero

       zer axola zenbat aldiz hil garen

Edo zenbatetan hil dugun. Eguzkiak zeharkatuak ditu

       sekulabelar landa dirudien itsasoa

Eta munduko kristaleria guziak. Bizitza

       heroikoaren seinalerik ez,

Baina untziak gertu daude, haizea aldeko:

       norantz abiatuko gara, Juan Sebastian?

Heurekin joanen gaituk gu, arrantzaleak,

       gure ardau botila ilunekin,

Gure otoitzekin, gure laban ezkutuarekin,

       hare ale bat garela ahaztutzeko

Goazemak eta turismoa eginen diagu astesainduan

       gure arima iganderako bezala jantziaz,

Harma kontrabandoa eginen diagu gauetan

       burruka zintzoenaren alde.

Filme esperimental batera sartuko gaituk desorduan

       auzo errebeldean panfleto proletarioak

Zabaldu dituen neskatilarekin, han ilunetan

       haragi antzeko mosu bat trukatzeko.

Edo izar naufragoak begiratuko ditiagu

       untzi zurkaiztuaren gainetik

Edozein alkool edanaz, solasean, eta hereseak

       erre ziren suaren inguruan berotuko gaituk

Historiaren zentzu zaila, arraroa, ekibokatua

       gure aldera ekartzeko ahaleginak eginez,

Kale oraindik ilunegiok norantza doazen igarri ezinik,

       esperantza tipi baten eritasunarekin.

Ezen eta gizona, pospolua legez, baliozko ezer utzi gabe

       akabatzen duk,

Bere kantak itzultzen dituk bakarrik etxera

       dortoka zaharren antzera.

w1987