Lili bat

Loretan dago aspaldi huntan

gure begien eder delarik,

gure bihotzen gorotzak baitu

ongarriztatu et' ernarazi.

Eder da... Haren hatsak, ordea,

zitala badu, herio-hazi:

iluntzen ditu gogo argiak,

ilauntzen ditu argiak oro.

Hilerri-lili horren zitalak,

hezur zaharren hautsak hazirik,

erhanik ditu aiten leinuak

eta zainiltzen gaitu semeok...

Lili haur ene landetan ere

aspaldi huntan ezin hila dut,

nahiz Iparrak astintzen duen,

nahiz kiskailtzen duen Hegoiak...

Ai! goragotik etorri-haizeek

ailezate jo ene landetan

et' eiharraraz «itxaropena»

izena duen zital-lili haur!

w1953

Musika: Imanol