Argatik

Eguzkitara zabaldutako

zapi urdin zan zerua

Izarraiztik Erniora

Argia urrezko oean,

etzatera zioan

Keixeta aldera.

Argatik alkar

maite izan gendun

inular girora.

Eguzkia odol zan

arrats malkoetan;

lainoak gorri ziran

argi zotinetan.

Argatik gure biotzak

lenengo mina izan zuten

egun artan.

Zerua auts kolore

ego aldetik;

argia zikin zetorren

zeru sabaitik.

Argatik gure amesak

lausotzen asi ziran

atsalde artatik.

Zerua goibel,

aizea nasi;

argia, ekaitz beldur

joan zan iesi.

Argatik gure maite usteak,

—zorion azi—

gau aretan

ziran ausi!