«Honetaz behar huke idatzi,

hartaz behar huke».

Aholkurik nork eman

badaukat, demontre.

Askoren solasentzat

gor edo nahi nuke.

Zergatik honetaz,

hartaz zergatik?

Zergatik ez neure

gogoak damaidan bidez,

zergatik ez jardun libre?

Gai inportanteez barne

eraman nahi naute

neure izate-moduarentzat

begirune gabe,

niretzat neure gaiak

ez bailira eta

asko inportante.

Neure gaiak, gaitxoak

erlieberik gabeko

esankizuntxoak

nahi ditut jaulki

ahotsik behartu gabe.

Beude gai inportanteak,

beude behar huke-ak,

aholku guztiak beude

beren handitasun

handiaren aldare

barrokoetan,

ale!