Carmen Gisasola Solozabal

Brieva

Modulo bakoitza

kolore ezberdina

—urdina / gorria / berdea / horia—

Mundu ezkutuan

        Uniformitatea

hormen artean

        Presoak

                besterik ez!

        Elkarren artean

                Komunikaziorik ez!

Patioko pinuondo parea

eguzkiak udan zizelkatzen

        Geriza

                luzatu eta estutzen

        buruari pentsatzea

                        Galazotzen

        Harresia atzamarrez

                dugu seinalatzen

                ukabilka

                        hasi nahiez

        Uniformitatea

        elkarren arteko

                        komunikaziorik ez!

                Presoak

                        besterik ez!

Patioko pinuondotako adarretan

        txoriak pausatzen

                beraien soinuaz

                        Presoak

                        Bizitzari oratzen

        Uniformitatea

        hormen koloreetan,

        Barruan presoak

        beste ezer!

Ausentzia

Zure irudia

noiznahi agertzen zait

edozein une goxotan

lotsati

zure ezpainak ausart

nirekin

gau eta egunez

ohean niri emanak

gure gorputz biluzian...

Zure gozoak edan nahi ditut

poro guztietan

zure ezpainen tolestura

harkor izan

nire kai hezean

zure fedea agortu

bion legeetara uzkurtu...

...tente

itxaroten nauzun bitartean.

Nire bularren jaia

erraien betekada

gure esentzien sutea

zapen lurrina

atzamar leunen asea

dastatu

dardarka asetu bitartean.

Auzitegian

Itoka edan dizkidazu ezpainak

uhan-praka maiztuetan busten nintzela

bizkar, hanka, beso, aho...

beroa instalatzen

lupa haitzari lotua baitzen

kala txoriak askatasuna lortu ostean

GINEN.

Arrano urdinak atzean planeatzen

gure plazera zaintzen,

logale

sentitzen zintudan

tente

laban egiten

kostaldean sartzen

harri ebakorrekin jolasten.

Janzkien tolesak

ezustean

josturak eusten

josturak eusten

gorputzeko atal bakoitza

eskeletoari indar egiten

azalaren elastikotasunak

igongailuan jarraitu zuen

Zu maitatzen.

Heriotzaren hautsa

Bart

ekaitza aurreko haizearen zorionean

orfano nintzen

violoncelloaren musikaz

irla koralez inguratuta

oheratzen.

Irratian

ezusteko ahotsak,

indarrez

nabizoa hondoratu zuen.

Goizeko orduetan

labanak haragia urratzen

lokartuz nindoan

emakumea

besterik ez nintzen.

Eguna argitzean

ibilbideko ur gainean

uholde ondorengo malkoak

baretuta

nora-ezko girtenik gabeko

kikera

nintzela jabetu nintzen.

Agurra

Agur esan nizun

ekain goiz batez

eguzki argiak

gure geroa

urgaineztatzen zuen.

Atzean

zure begirada izoztua

nirearekin laban egiten

uzten nuen

gatzitutako ariman

belauntzia triste abiatu zen.

Zorizko egun hartan

bakoitzaren bidea

zeharkatzen hasi ginen

gure bihotz askatuetan

denbora zehaztuta

betiko geratuko zen.

Basamortuko dunetan

iraganeko hautsetan

Zure izena zamatzen darrait

uda ezberdinetan,

neguko min uharre ilunetan

iraganari begira

bizitza isladatzen zait

bihotzeko oroitzapeneko

bidezidorretan.

Carmen Gisasola Solozabal 1958 Markina   1990 atxilotu zuten eta Frantziako espetxeetan egon ondoren 2001ean estraditatu zuten Espainiara eta Brievako espetxean dago gaur egun.   C.P. Avila II Apdo. 206 05.149 Brieva Avila.