Ispilu anonimoak

sekretu arrunten

hondorik gabeko amildegiak

emakume arropak frogatzen dituen adoleszentearenak

negar dagien apaiz etsitu agnostikoarenak

tabernetako komunetan pikatzen den heroinomanoarenak

Ispilu horituak

tristura egozleak

heriotzaren testigu mutuak

gartzeletakoak, kuarteletakoak, eskoletakoak,

atzean utziko presondegi guztietakoak

gatibutzakoak, animaltasunaren zigortzaileak.

Ispilu indargeak

hemengo gizakion

bizitzaren bisaia ahituak

bizartegietakoak, geltokietakoak, takiletakoak

egunerokotasunean kateiatzen gaituztenak

beharren beharraren oroi erazleak.

Ispilu proletarioak

mundu guztikoak

bakardadeak elkartzen zaituztenak

baso komunikanteen legearen menpean bezala

batetan min tantarik minimoena erortzean

beste guztietan hedatuz agertzen zaizuenak.