Gauerakoan
Gauerakoan
1984, poesia
64 orrialde
84-398-1079-2
Kepa Fernandez de Larrinoa
1958, Bilbo
 
 

 

Elkarrenganako indar hautsia

 

Etxera joanda gero

zertarako negar egitea,

baldin eta zurekin ezin egoteak

maizago banatzen badu

elkarrenganako indar hautsia.

 

Atean geratu da beldurra. Egunabarrean

elkarri esandako agurrak

lurperatu nahi du, bion basamortuan,

leihoan zehar dakusadan zeruko argizagia.

 

Konprenituko al duzu, agian,

barnetik ihesi azaltzen zaidan oinaze sufritua,

isildu ezin dudan tormentuaren soinu herdoildua,

ikusten ez zaitudanez geroztik

motelduz doan maitasun-erroa?

 

Zertarako egon etxean

negar eginez gero,

zertarako nire biziera

zurea ez ezagutuz gero.

 

Hara non egunaren argia,

esan beharraren sentimendu garbia:

Bai ote niregandik joango

aspaldian finkatu izan zaidan dudarik frango?