ERRETENA GAINEZKA

Euri sarriak etxe aurreko

errepide koxkorraren

bazterreko erretenari

gainezka eginarazten zionean,

aitzurrarekin ttirriki-ttarraka

bidea irekitzen zion urari.

Inork ordaindu gabe,

inoren mehatxurik gabe,

auzolanaren zentzurik gabe,

alegia deus ez hutsaren truke.

Ez zen inor baino hobea,

ezta bereziki eskuzabala ere,

antipatikoa zen, ezer izatekotan.

Baina erreten gainezkatuak

aitzurra eskatzen zionean

ez zuen inoiz hutsik egiten.

Euria, erretena, aitzurra

eta norberaren eskuak

munduari zentzua ematen.

Zikoitzik zikoitzenarentzat ere,

paradisu infinitu baten miniatura.