PASATU DUN OKERRENA

Lasaiago nagon,

pasatu dun okerrena,

edo hori pentsa zezakenagu behintzat,

latza izan dun baina etorriko ditun une hobeak,

joango gaitun berriz ere hortik zehar,

auskalo nora, auskalo zeren bila,

baina pozik handiena

elkarren ondoan gaudela sentituta,

begiak barrez, umetuta,

eta orduan ere tarteka

gogoratuko gaitun gertatu denaz,

sufritu dugun denarekin,

hartu dugun kolpe mordoarekin,

baina eguzkiari

geure gorputz barrura sartzen lagako zionagu,

eta berak nahi ez badu eskatu,

eta erregutu ere bai behar izanez gero,

alamena eman,

barrura eta barrura sar dadin,

ahal duen lekurik barrukoeneraino,

geu ere barru-barrutik eguzki bihurtu arte,

eta eguzki izango gaitun orduan une batez,

orain gezurra ematen badu ere,

hezurrak mela-mela eginda

laga dizkigun zaparrada beldurgarri honen ondoren.