LUR AZPIKO EGUZKIA

biraka jarraitzen du itsasoak urdailean

olatuak eztarrian gora

galerna batek lausotzen ditu gure begiak

hondartza zuri batean gaude

hiru robinson crusoe

bata bestearen ohol iritsi ginen honaino

txirlak bagina bezala utzi gaitu elurretan mareak

oasirik gabeko basamortuan dromedariorik ez

hareak erre egiten dizkigu oinak

hodeiek euri tropikalak arratsaldero ipar polotik

lur azpiko eguzkiaren peskizan etzan gara

hormatzen ez den behin-behineko larritasunarekin

oinatzak hondarretan olatuek ihes egiten duten aldiro

artikoko hiru hartz izeberg gainean saltoka

zenbat negu ote iristen ez den uda honek

dena itsaso dena kezka dena sosegu eza

zein balek irentsiko ur lasterrak eramaten utziz gero

zein arrainen bazka izanen gara ohartu gabe

izotz blokeen gainean giharrak astindu ezinda

bata bestearen arnasatik oxigenoa hartzen

amore eman ezin duten hiru naufrago gara