HIMALAYAKO BALADA

 

 

Astelehenetan, Ganehs. Rajiv asteartean.

Eguaztenetan, Gopar. Dinesh eguenean.

 

Barikuetan Baju. Eta kito astea.

Aluak asteburuz hartzen dit bakea.

 

Hamasei urterekin ezkontzaren gala:

batek izan behar zuen senar printzipala.

 

Tropela zain izan zen, legea donosa.

Urtebetera nintzen guztien esposa.

 

Orain ninia daukat, Himalayako elur.

Laster gidatuko du gure azienda segur.

 

Bost anaien juntura dut defendituko

haien aitaren lurrak ez eralkitzeko.

 

Gonorrea izan arren, zertarako nago?

Gizaldietako usantza betirakotzeko.

 

Nire herria urrun dago; hiria, urrunago.

Orain mainaka hasteko astirik ez dago.

 

Hemen bada iturria, eta aker bixiak.

Ilundiko zeruan, laino-geun goriak.

 

Dardarka ari da etxolan olio-ontzia;

agureek pil-pilka euren ilintiak.

 

Gurean ez dakigu zer den jelosia:

berdin hartzen ditut nik anaia guztiak.

 

Bost gizon dauzkat baina Drapaudik bezala

neu naiz bost ugazabon nagusi mazala.