HARIA

Trenak harrapatu zuen emakumea

azkenean

hil egin dela dio egunkariak.

Egun batzuk joan dira istripuaz geroztik

eta harrigarria da

tragediaren kolpearen ondoren ere

nola ez den desagertzen

gorputza

eta nola gelditzen den hor

gertakarien eta historiaren

bazter batean bezala

atzera bere baitarantz biltzen.

Hala irauten du minak,

eta beldurtzen nau iraupen horrek

guztiongan igartzen dudalako

haren arrastoa.

Hatzekin laztanduz

jarraitu nahi nioke haria

jatorriaren mugetaraino

eta liluraz

zabaldu begiak

lehen itsasoaren ertzean

han zauria seinalatzeko

apenas

inorena izaten hasi ere

egin ez den bizitzan.