Arrotz eta eder
Arrotz eta eder
2016, poesia
136 orrialde
978-84-92468-85-0
azala: Xabi Erratzu
Pako Aristi
1963, Urrestilla
 
2014, poesia
2003, poesia
2001, poesia
 

 

DIPTIKOA

 

 

Begirada bat soilik izan liteke

amodioaren habe nagusi,

ustezko edo benazko

desanparo aldietan sostengu.

Begirada batek lotu zaitzake

hezurrek errefusatzen dituzten

paraje heze hauetara,

begirada batek bildu

—hain topikoa dena—

iragana, oraina eta

geroaz gera daitekeena.

Begirada batekin moztea zailagoa da,

gorputz batekin baino.

 

Gorputza amodioaren probaleku,

gogortasunaren hartzaile den

haragi samurra

bat egiten

hauskortasun perfektuan

unibertsoak hautatu bailituen,

entseatu gabe ere berez

estekatzen diren giharrak,

gogoangarri diren orgasmoak

errepikapenean higatzen hasi arte,

estasia azalez azal

bidaiatu nahian,

dardararen berpizkundea bilatuz

gero eta urrunago.

Gorputzetik pertsonara

jauzi egitea zailagoa da

beste gorputz bat bilatzea baino.