Arrotz eta eder
Arrotz eta eder
2016, poesia
136 orrialde
978-84-92468-85-0
azala: Xabi Erratzu
Pako Aristi
1963, Urrestilla
 
2014, poesia
2003, poesia
2001, poesia
 

 

ILINTI BAT EGUNSENTIAN

 

 

Esnatu zara,

egunsentiaren altsumak dira

zure begiak,

zabalik utzi zenuen

pertsianaren hutsartean.

 

Lehen soinuak

dituzu ebasten,

txori kantuak,

oin hotsak auzoan,

trafikoa urrunean.

 

Garbi zaude,

eder eta fresko,

duela bi ordu eskas

belarretan pausatu den

ihintz tanta bezain,

ordu erdiko bizitza baino

geratzen ez zaion

kristal iheslariaren haurride.

 

Haize berria zara,

atzokoaren ezberdin,

bare duzu arnasa,

zure gogoaren nasa,

eta izaki ororen

ondasunik preziatuena

duzu eskura:

beste egun bat

bizitzeko aukera.

 

Izan zaitez arin,

egon zaitez erne,

pentsamenduek argia

irents ez dezaten,

oroitzapenek eta damuek

zure lumaje koloretsua

belztu ez dezaten.

 

Eutsi epifaniaren mirakuluari,

munduaren neke zaharrak

garaitu ez zaitzan.

 

Lotarakoan agur

esango diozun eguna

diamantezko ihintza

izan dadin,

gozatu ondoren

ihes egiten

utziko diozun printza.