Alde erantzira nabil
Alde erantzira nabil
2016, poesia
112 orrialde
978-84-92468-81-2
azala: Itziar Moreno Martinez
Ekhine Eizagirre
1984, Zarautz
 
 

 

ABSENTZIEN ITSASOAN

 

 

Itsas karakoletako

hots errepikakorraren antzekoa da

absentzien itsasoa,

edo lau hormaren arteko

isilune tristea.

 

Hutsuneari dantzatutako

maitasun balada da

absentzien itsasoa,

egoera latzetan samurtu ezineko

une krudela.

 

Ezertarako eta denerako balio duten

tramankuluz inguratutako lekua da

absentzien itsasoa,

irudi exotiko ukiezinen

pantaila hotza.

 

Lagun eta sendi gosea da

absentzien itsasoa,

zoriontasun guztiz ezin asea.