Spray
Spray
2011, poesia
96 orrialde
978-84-92468-27-0
azala: Lander Garro
Paddy Rekalde
1964, Deustua
 
2006, nobela
2004, poesia
 

 

ASPALDIKO LAGUNEI BISITA

 

Ganguren aldeko gandorretatik ibiltzea gustukoa du,

halakoetan ez du etxean ezer esaten

errieta egingo diotela badakielako.

"Sasi arteko bidezidor horiek ez dira

83 urteko agure batentzat"

errepikatzen diote behin eta berriro,

"inoiz labain egingo duzu, seko jausi

eta hilda topatuko zaituzte".

 

Debekua dela-eta, bestelako aitzakiak bilatzen ditu

eta, autobusez heldu ostean, tipi-tapa abiatzen da gora

pinudiak baino gorago dagoen zabalgune batera,

sasien artetik erabat ahaztuta oraindik ikus daitezkeen

Burdinazko Gerrikoaren aztarnetara.

 

Gerra egunetako hormigoizko plataforma batean jesarri

eta inguru hondatuetara begiratzen du:

lurpeko pasabidera doan sarrera, metrailadore habiak,

tuneletako aireztatze zuloak...

eta harri handi eta zapala, goroldio orbanez josia,

egun ikaragarri haietan batzuetan euren bazkalekua zena.

 

Orduan akordura etortzen zaizkio lagunak,

gandor horietan bere ondoan azken hatsa eman zutenak,

eta zerua ezin urdinago badago ere

zirimiri antzekoa igartzen du begietan.