HERRENAREN AHALEGINA

Bada izotz arrakalatua eta bada

                                        idi bihotzaren usain arina.

Bada fereka ahaztua eta tuneletik datorren

                                        zarata ezezaguna.

Bada herrenaren ahalegina eta

                                        euriak mindutako kristala.

Bada ekaitzaren indeterminazioa eta

                                        zure ezpainen klabea.

Bada hizki preteritoen aztarna eta eskuen jolasa.

Bada dimentsioetako nekea eta

                                        argiaren plagio primitiboa.

Bada nire bihotzaren amnesia eta

                                        zure bihotzaren amnesia.

Bada ordu askoren faltsifikazioa eta

                                        alanbrearen pasibitatea.

Bada katalogoen noraeza eta adituen norabidea.

Bada zure mihiaren substantzia eta azalaren materia.

Bada musuen gardentasuna eta erroien antsietatea.

Bada zure amodioaren esklusiba eta

                                        dardara guztien sorburua.

Bada zerbait, ohartu gabe, samurtasunez.

Bada sortu eta soraio biziko dugun gomuta.