Alea
Alea
2009, poesia
120 orrialde
978-84-92468-08-9
azala: Lander Garro
Beņat Sarasola
1984, Donostia
 
2019, nobela
2007, poesia
 

 

EGUZKI APALEAN

 

«Loreak udaberri honetan ez dira loratuko» esan du

Bazkaltzen ari zela. Bere senarraren indiferentzia (ez

Da ezertaz ohartzen), aitaren presioa etxeko

Hipotekaren gainean, hitz goxotan ezkutatutako

Amaren lezioak, haurren etengabeko eskaerak,

Gaixotasunak. Belarriak pasadizo abandonatu

Batean utzi ditu. 60ko hamarkadan gazteak zirenak

Bezala, eguzkia laranja kolorekoa jarri denean,

Mendi magaleko banku batean eseri eta

Alkandoraren mahukak jaso ditu. Umeak baloia

Hartuta etxera itzultzen ari direla dirudi, izerdi

Patsetan, jertseak gerrian lotuta. Oroitzapenak

Galtzen direnean, heriotza zer izan daitekeen pentsa

Dezake batek; aurpegi bat ahazten duzunean, norbait

Gutaz trufatzen ari delako sentipena izaten duzu.

Horregatik ez du ulertzen zergatik ez zenion

Barkatzen; hain baikara ahulak, azken batean.

«Itsasontzi horrek zer eramango ote du bere baitan,

Soto ilunetan?» galdetu du ozen, inork entzun ez

Badio ere. Behatzarekin seinalatu du gero itsasoa

Noraino ailegatzen zen, esan dezagun, zoriontsu

Zenean. Eta zuk zer uste duzu, balio al dute

Ezertarako garabi erraldoi haiek? Ez, ez erantzun

Orain, itxoin apur batean; ikusi, musika banda bat

Pasatzen ari da kaletik (leihotik begiratuz). Duela

Hamabi urte eraitsi zuten etxe hori (oroitu da) eta

Segidan etorri zen gainontzeko guztia. Gaur ere.

Horrela, tximiniek kea botatzeari utzi diote, edo

Beharbada, egun botatzen duten kea ez naiz ikusteko

Gai. Zeruak igual-igual jarraitzen duela esan zenion,

Haserre jartzen zareneko keinu hori eginez, triste

Zeundela zirudien-eta, etsita; baina berak, sarri

Bezala, ez zizun jaramonik egin. Atzera so egin du eta

Ate bat ireki dutela ohartu da. Duela berrehun urte

Biziko bagina, aldapan gorako andrea ur bila doala

Pentsatuko luke. 2007. urtean (martxoaren 4a) bizi

Gara ordea, Mediterraneoko bazter batean. Eskerrak

Inguru honi, hemengo jende maitagarriari, bestela

Idazteari utziko ziokeen aspaldi (batez ere haurrak

Jaio zirenean), edo ez zen bederen eskailera horietan

Eserita egongo. Zuk oraindik balore galdu batzuetan

Sinesten duzula ez dago dudarik, baldintza

Okerrenetan kemena izateko gai zara, tinko eusteko

Apustua egiten duzu beti, bai; baina zertarako hau

Guztia? Zer irabaz dezakegu? Minutu alai batzuk

Edukitzeko sikiera balio al dezake? Ilundu du,

Mahukak luzatu eta bueltako bidea hartu du berriz,

Bihar zer egingo duen jakin gabe. Edozer da posible.

Gaur ilargi eklipse bat izango dela esan dute irratian,

Kolore bereziak ikusi ahal izango dira zeruan. Eta ez

Da antiojoen beharrik izango gora begiratzeko.

Zerbait pentsatu beharko zenuke.