ITZALAK

Telefonoa gorrotatzen zenuen,

kartazalekin gaizki konpondu.

Ez zinen sekula azaltzen

aurrez erabakitako enkontruetara.

Gutxien espero diren desorduetan

jotzen zenuen gela ezkutuko atea.

Inork ezin zuen ezer esan ispiluez

zu presente egonez gero.

Zure keinu arraroengatik

norbaitek zerbait galdetzean,

kandela argiek marraztutako itzalak

zure atzetik zebiltzala esaten zenuen.

Sarrailetako giltzak zenbatzen,

leiho ertzetatik barrandan,

eskaileretako bonbillak amatatu ahala

propaganda bila ibiltzen zinen buzoietan.

Etxeko ilunpe zarratuan

zirritutik begira geratzen zinen

katuak ere lokartzen zirenean.

Beti erne, mamuak noiz agertuko zain.

Nork sinetsi behar zuen arrazoi zenuela,

kandela argiek marraztutako itzalak

zure atzetik zebiltzala esaten zenuenean.