MAHAI GAINEAN

Barkatu:

gutunak ireki dizkizut berriz ere

zure baimenik gabe.

Gutunak eta erraiak.

Behin erran nizun

zure isilune bakoitzeko

poema bat egin izan banu...

zure hutsune bakoitzeko.

Eta orain diotsut:

poeta izatearena, legarrezko letrak isurtzearena,

ez dela zure errua;

jatorrizko bekatuarekin munduratu nintzen.

Barkatu:

zauri zaharrak gatz-ozpinetan

paratu dizkizut berriz ere

zure baimenik gabe.

Eta gero joan egin naiz.

Barkamen hau sukaldeko mahai gainean utzi gabe.