NON ZAUDE

Txikitan, ezpondatik behera jausi nintzeneko hartan

antzeko mina sentitu nuela dut gomutan.

Eskutur okertuak metalezko mina irradiatzen zidan

besoan gora, eta zainetan erretzen zen.

Lehen ere antzekoa sentitu dut eskuan

iltzea sartu didatenean.

Lehen kolpean batez ere,

eta gero min irradiatua,

lokietara heltzen zaidana.

Ezkerrekoan ostera, ez da hainbesterako izan,

agian, mailua sostengatzen eta

kolpatzen duenaren begietan malkoak ikusi ditudalako.

Agian mina, partitua sentitu dudalako

edota konortea galtzekotan nengoelako.

Txikitan, ezpondatik jausi nintzen

une hartako desio bakarra

nire ama etorri eta besarka nintzala zen.

Orain ez dut besterik desio.