AGURTZEKO ZAPIAK

Ahalik eta urrunen bidali nahi nituzke geziak,

pinu altuetatik hartuko ditut bihotzak,

murrizketa handia egingo dut kortikoideekin,

haranetako hizkuntzetan idatziko ditut epilogoak,

belaunikatuko naiz poeta berrien ahoetan,

intxaur zaharrekin egingo ditut meteoritoak,

izurdeei mintzatzearen misterioa azalduko diet,

kea atera baino lehen amatatuko dut ilusioen sua,

okaranak planeta bihurtuko dizkizut,

ubarroien abiaduraren ariketa buruturik egongo da,

maleriaren aiztoak ez du oihurik egingo eta

gudetako gerlariek bero ekarriko dituzte eskuak.

Hasiko naiz ibiltzen eta arrainekin batera

geografiak bustitzen.

Hasiko naiz gaztetzen, keinuz, hitzez

eta orduan bataioa ezinbestekoa izango da,

abisatu gabe heldu den aro itxaropentsu berri honek

antagonikoa den estiloari uzten baldin badio

eta faltsukeriaren segadaren ordainetan

garbitutako zapiak ematen badizkit.

Astinduta, oraintxe.