EZIN BAZTER DITZAKEDAN HITZAK

Harritu naiz museoan

birzikla daitezkeen elementuez osaturiko

artelanekin, margolanekin.

«Materiales de desecho» izeneko bilduma

ederra izan da.

Kartoia, kableak, plastikozko edalontziak,

latorrizko ontziak.

Artista fin hark dena darabilela esan nahi dut.

Nik, ostera, ezin bazter ditzakedan hitzak ditut.

Gomuta, zenit, bihotza, detritu, marrubiak, autopsia,

galtzerdi.

Egunerokoak dira nire lana burutzeko

zerrendatzen ditudan hitzak.

«Materiales de desecho» izenekoa ezin lortu

horrelakoak erabiliko ez banitu.

Zure musuak,

zure gorputza,

zure begirada.

Zu.

Eta hauek ezin birzikla daitezke.