BAR-BRASSERIE

Zu ikustearren hartu dut autobusa hirira.

Bar-brasserie batean sartu naiz zu noiz agertuko.

Ez da nirea zuri hoska dabilen eztarri urratu bakarra,

ezta zurea ere deserrian dagoen behako bakarra.

Garagardo beltz eta kafe txar artean igaro dut eguna.

Ostalerak bar-brasseriea itxi arte egon naiz

zalantzaren eserlekuan jesarrita, berandu egin den arte.

Ezetz esan diot ostalerari: «Ez nago inoren aiduru»,

eta kikaran gelditu den gau-hondar mikatza edan dut.

Zutaz oroit egitea

orri galdu bat izan da neguko egun motzenean,

erbeste isil bat izan da, barruan ainguratua.

Etorritako bidetik noa zu ikusi gabe

azken orduko Pesa-n:

«26 St. Sébastien (péage)».