Aingurak erreketan
Aingurak erreketan
2001, poesia
88 orrialde
84-95511-44-4
azala: Xabier Gantzarain
Jon Benito
1981, Zarautz
 
2010, poesia
 

 

GERRAKO PARTEA

 

Artilleria gogorrez kolpatzen zuten hiria

irratia piztuta loak hartzera ohitzen hasi ginen

atertu gabe jarraitzen zuen elurrak ere

 

Lehergailuek aterpe zaharrak bota zituzten

eta nekazariek ihes egin zuten noranahi

 

Hankaz gora geunden

gauza ederrak ikusten genituen begien parean

Apenas genuen oinarrizko premiak asetzeko ezer

herriko emakumeak mutilatu zituzten

eta sabelak puztu zitzaizkigun gabeziez

 

Burusi azpian geneuzkan azken fusil baldarrekin

babesten ginen

hondamendiaren arkitektura

eta duintasunaren prezioa ezagutzeko

 

Telefonoak noizbait joko zuen

itxaropenez irauten genuen

Alferrik zen lurrak ereitea

joanak ziren goldeak erabiltzen zekizkiten azkenak

eta belarri bat galtzeko

edo hezur lehorrak topatzeko arriskua zegoen

Soldaduek hemen utzi zituzten bizikletak

eta gurpilekin flotadoreak egin genituen ez itotzeko

 

Anbulantzia batek telebistako aurkezleren batek

edo Nazio Batuetako agintariren batek

noiz deitu itxaron genuen egunetan

galdetzeko ea gu ginen auxilioka ari ginen bakarrak

munduaren simetriaz galdetzeko

eguzkirik ba ote zen hodeiez bestaldean

 

Lehen erasoaldietan moztu zituzten telefono hariak

baina joko zuen zain geunden artean

 

Itxaropena ei da galtzen azkena