Norbait dabil sute-eskaileran
Norbait dabil sute-eskaileran
2001, poesia
104 orrialde
84-95511-42-8
azala: Xabier Gantzarain
Harkaitz Cano
1975, Lasarte
 
2018, nobela
2015, narrazioak
2011, nobela
2005, narrazioak
1999, nobela
1996, nobela
1994, poesia
 

 

DARDAREN INTERPRETAZIOA 2

 

Queensboroko zubiaren bestaldean

East River ertzeko faktoria birrinduan adreiluak

biltzen dabiltza gazte mexikarrak.

Osorik dauden adreiluak baino ez zaizkie baliozko.

Hamabost xentimo ematen diete bakoitzeko.

Izan zituen behiala leihoak eta beirak faktoria zahar

gaur birrinduak.

Faktoria suntsituko leihoetan behin

Empire State eta

Ezpainetako Barra eta

Chrysler Building

eta gainerako etxeorratzak islatzen ziren.

Ehundegi bat zen faktoria hura eta alkandorak

josten zituzten mexikar emakumeek,

egunean hamalau orduz,

pedaldun makinaz. Erne. Entzun daiteke gaur ere

makina gelako pistoien zarata.

 

Hatzen pespunte dardartian, leihoetan islatu

zerulerroko eraikinak urtzen zirenean,

irudi zen etxeorratzen zerulerroa bera

josten zutela emakume mexikarrek,

eraikuntzei eta argiei

hartzen zizkietela bebarruak ilundu ahala,

eta hiriak jarraitzen zuela arnasten, haien hatzez

jositako botoietatik.

Eta ohartzen ziren emakume mexikarrak hala zela

zinez

ezinbestekoa zela haien lana munduarentzat.

 

Dardara egiten zuten hatzek gero,

eta etortzen zen gaua adreiluak inarrostera

beren aurri etorkizuna iragarriz.