Harrien lauhazka
Harrien lauhazka
1998, poesia
96 orrialde
84-86766-91-5
azala: Iņaki Martiarena
Iņigo Aranbarri
1963, Azkoitia
 
2018, narrazioak
2014, nobela
2011, nobela
2008, nobela
2006, saiakera
2000, poesia
1997, kronika
1994, nobela
1989, poesia
1986, poesia
 

 

GAUEKO

 

Albiste izugarriek iratzarriko naute gaur ere

Gorpu bat aurkituko dute zohikaztegian

Eta begiak izanen ditu

Zerua bezain beltzak, idoroko duenari behatzeko

        ezinago zabal

Oso lasaituko gaituzte gerora:

Ehundaka urte zeramatzan hilik

Kafe berria eginen dut. Polen zaparradak horituko du

        balkoi hegala

Paper zaharrak nahasten emanen dut gaua. Ezaguna zait

Argazki zaharrek asaldatuko naute beren egonarritik

Eta loerrean, ahazturik nituen aurpegiak

        laztanduko ditut ostera ere

Orain badakit zenbat urte harrapatuko ditugunekoa

        lakio dela

Estakuru merke bat

Asasinoaren galdera koparen aurrean

Oroitzapenaren kaxoian zabaltzen emandako bizitzara

Maitasuna gatibu baten begiz ukitzera

        kondenatu nahi gaituzte

Bizi garen artean itzalez hautsitako leihoetara loturik

Gurea da errua, zin egin genuen denak aterako genituela

Urkien sustraiek ez zutela inor sehaskatuko

        guk alde egin ondoren

Elurpean sinatu genuen lur berriaren errugabetasuna

Sinetsidazu, orain ez nago arkeologiaren gorazarrea

        idazteko

Berandu dut ezein zuritze aitorpen sinesgarri izateko

Ez naiz gauza izaniko galerek ekar dezaketena neurtzeko

Egunkari ebakinak arrantolatzen emanen dut

        egunsentirainokoa

 

Zaldi urdinak gauaren lautadan egun berrien iragarle