Galera errepikatuak
Galera errepikatuak
1992, poesia
100 orrialde
84-86766-39-7
azala: Yuka Fujii
Juanra Madariaga
1962, Bilbo
 
2009, poesia
2003, poesia
 

 

IGURIAREN TRILOGIA ETA BAT GEHIAGO

 

1. Iguria naiz

 

          Iguria naiz,

          gauak izartegiari begiratzera

          behartzen duen haietarik,

          hotz krudelak lo egitera

          uzten ez duen haietarik.

          Iguria naiz,

          ilargiari ondikorik minenak

          kondatzen dizkion haietarik,

          erredolari emaztea baileukan

          eleztatzen dion haietarik.

          Iguria naiz,

          eta etsaien etortzea igurikatzen dut.

          Iguria naiz,

          eta gaueko sakaila igurikatzen dut.

          Iguria naiz,

          eta batzutan, etsi-etsian, igurikatzen dut

          heriotza.

 

 

2. Erregea eho behar nuen

 

          Erregea eho behar nuen gauez,

          halaz, ene brokelaren gibelean izkutatu nintzen,

          iguriak ene begien erlantzak ikus ez zitzan.

          Boboien kantua ihakindatu nuen gero,

          gauari fida zekion,

          baina halaz guztiz, zelatan segitu zuen

          iguri fidelak.

          Loak hartuko zuelakoan nengoen

          eta hotzak makur eta etzanarazi,

          baina halaz guztiz, zut segitu zuen

          iguri fidelak.

          Argizagia bete eta zuritu zen izartegian,

          eta hark eresi xarmant bat eskaini zion,

          baina halaz guztiz, zurt segitu zuen

          iguri fidelak.

          Gau hartan erregea ez nuen eho,

          oinaze handia senditu bainuen

          iguri balenta azkonaz

          ehotzean.

 

 

3. Dorrea

 

          Dorreak irme zirauen goiztiri horretan

          baina hutsik.

          Ekia murra bailitzan esnatzen zen.

          Itxesaren susmoa bihotzean zeukalarik

          arrajin zen bardako arimaren ebaslea, erahilea,

          ezinago triste,

          ezinago etsiturik,

          ezinago bano.

          Talaiaren iguria eho zuen

          bihotzeko azantza inarrosiz betikotz,

          baina zein ere izterbegia zen,

          apiril horretan dorre hartako iguria egin zen

          eta besteak bezala

          haiduru dago,

          heltubada, heriotzaren ere.

 

 

+. Iguri guziek

 

          Iguri guziek diraute

          hodeiertzari biziki estekaturik,

          ekaitzen gain edaten eta pizten,

          mengo honezaz eresiak sortzen,

          errauts bihurturik,

          karraldoz meztiturik hil direno,

          iguripenaren esperoan hil direno,

          haiekin batera hil gareno.